Владата синоќа ги усвои законските измени за азил и по итна постапка предложените измени ќе одат на расправа во Собранието. Според предложените измени во Законот за азил секој мигрант што ќе ја помине границата ќе добие потврда дека во земјава може да остане најмногу 72 часа, по што ќе мора да ја напушти Македонија или да побара азил.
По најновата вест за измените, од невладината „Легис“ бараат законот со посебна уредба веднаш да започне да функционира, пред да помине во Собрание. Од таму апелираат тоа да важи за барем жените и децата.
Владата донесе одлука и да се формира работна група од министрите за надворешни работи, за здравство, за полиција, локална самоуправа и социјала која ќе ги следи состојбите со мигрантите и ќе презема мерки и чекори во согласност со своите надлежности.
Предмет на разгледување ќе бидат капацитетите каде ќе бидат сместени бегалците, во кој дел од државата, како ќе бидат прифатени од локалното население бидејќи се работи за осетлива проблематика, како и за состојбата на граничниот премин Табановце.
Мигрантите од Прифатниот центар во Гази Баба, вчера побараа од невладините организации и граѓаните, помош, низ плач, објаснувајќи дека не се терористи за да бидат третирани како затвореници.
За нехуманите услови во Гази Баба неодамна покрај невладините организации, реагираше и Народниот правобранител кој алармираше и за заразни болести што се шират во Центарот.
Стотици мигранти од Грција, преку Македонија и Србија се обидуваат да стигнат во развиените европски држави. Бидејќи за македонските закони тие се илегалци, во страв од полицијата најчесто пеш се движат по пругите или автопатот од Гевгелија кон Куманово.