Израел регистрира најголем број на нови случаи на коронавирус за едно деноноќие од почетокот на пандемијата, иако бројот на сериозни случаи продолжи да се намалува во услови на зголемен интензитет на вакцинирање со трета доза, објавија израелските медиуми.
Податоците на тамошното Министерство за здравство покажуваат дека во текот на изминатото деноноќие се регистрирани 11.187 новозаразени лица, што е зголемување за 1.755 заразени лица во споредба со претходниот ден. Досегашниот рекорд за време на пандемијата беше во регистриран во понеделникот со 11.140 заразени за 24 часа.
Истовремено, бројот на тешките случаи се намалува трет ден по ред. Вкупно 666 пациенти се наоѓаат во сериозна здравствена состојба, од кои 208 се критични состојба и 149 на респиратор. Израел во моментот има 90.058 активни случаи.