Извештајот е дежа ву, нешто што е веќе видено, неудобните гестикулации и говорот на телото на Филе покажуваат што се крие зад воздржаните зборови, вели за НОВА, професорот и поранешен министер за надворешни работи Денко Малески.
Според професорот Малески, сеуште не може да се направи пробив, бидејќи и двете страни тактизираат. Тој вели, ЕУ се обидува да не ги сруши сите мостови со Македонија, да одржи каква-таква комуникација со властите. Додека Владата на Македонија пак, се обидува да ги раздвои двете нераскинливи нешта, односно реформскиот процес за што самата Влада смета дека е успешна, и решавањето на проблемот со името, кои сепак не можат да се раздвојат, а во догледно време ЕУ нема да ги смени своите правила.
Малески потенцираше дека во Извештајот, нотирани се општи работи кои сите ние ги знаеме, но Европската Унија се обидува да не ги драматизира причините за евентуално раскинување на врската, бидејќи и самата не сака да ги отфрли надежите за враќање на Македонија кон нејзиниот пат кон евроатлантските интеграции.
Воедно, Извештајот за напредокот на Македонија на својот пат кон ЕУ, кој денеска го презентираше еврокомесарот Штефан Филе, забележува дека Македонија не запрела со реформите, и дека ќе добие препорака по петти пат, но изрази особена загриженост за состојбата со медиумите, а на Владата и посочи особено да обрни внимание на ефективно имплементирање на препораките во сферата на владеење на правото, (слободата на изразување) и борбата против корупцијата.
Премиерот на Македонија, Никола Груевски, претседателот Ѓорѓе Иванов, и министерот за надворешни работи, Никола Попоски, го поздравија денешниот извештај како позитивен, и најавија понатамошно работење на проблемите нотирани од страна на Комисијата.