Генералниот секретар на ОН Бан Ки Мун денеска во Советот за безбедност ќе го презентира многу очекуваниот извештај за употреба на хемиско оружје во Сирија.
Тој подоцна ќе го информира за тоа и Генералното собрание. Извештајот е подготвен од тим инспектори на ОН за хемиско оружје, чиј мандат беше да утврдат дали во Сирија биле користени смртоносни агенси, но не и кој бил одговорен за тоа.
Бан во петокот рече дека верува оти извештајот ќе потврди дека на 21 август во нападот во близина на Дамаск било користено хемиско оружје.
Американскиот државен секретар Џон Кери и неговиот руски колега Сергеј Лавров сретнаа во петок со пратеникот на ОН за Сирија, Лакдар Брахими во Женева. Тие дискутирале за рускиот план за ставање на сириското хемиско оружје под меѓународна контрола за да се избегне американски воен напад.
Кери и Лавров се согласија повторно да се сретнат на крајот на месецот во Њујорк за мировни разговори, кои последен пат беа одржани во јуни 2012-та. Но Кери кажа дека секаков напредок ќе зависи од успехот на отстанување на сириското хемиско оружје.
Сирија се приклучи на меѓународната забрана за хемиско оружје, но инсистира дека има еден месец да даде детали за своите резерви на хемиско оружје. Претседателот Башар ал-Асад во четврток кажа дека тој ќе го финализира договорот за отстранување на хемиското оружје доколку САД престанат да се закануваат со напад.