Полицијата поднесе кривична пријава за сквернавење на умрен против битолчанецот кој си ја закопал мајка му во дворот оти немал пари да ја закопа. Соседите на човекот од битолскот село Егри забележале дека жената ја нема, по што пријавиле во полиција.
Распитот на истражниот судија покажал дека жената починала на 17 Јануари од ненасилна смрт. Синот на жената кажал дека немал пари да и направи погреб на мајка си, а соседите во разговорите со полицијата потврдиле дека семејството е многу сиромашно и веројатно се срамеле дека не се во можност да направар погреб.
Според социолозите, овој случај е уште една тажна илустрација за социјалните состојби во земјава. Професорката Татјана Стојановска – Иванова ги повикува институциите да бидат многу повеќе вклучени во овие проблеми.
“Бедата не ги прави луѓето сами по себе нечовечни, но ги приморува да отстапат од својот вредносен систем поради притисоците од неможноста да се живее нормален живот во економска смисла. Овој случај, да се закопа сопствената мајка во дворот поради немаштија е илустрација за алармантноста на социјалните и економски состојби.
Тоа не значи дека тој не ја почитувал својата мајка, но едноставно немал можност да го направи тоа на достоинствен начин. Е тука треба да се вклучат инстутициите, центрите за социјална работа, невладините организации кои се занимаваат со социјална инклузија, и секако, религиските заедници кои не смеат да ги занемаруваат ваквите случаи”, вели Стојановска – Иванова.
Погребот може да ги чини граѓаните и до петстотини евра. Доколку умрениот добивал пензија, државата ги надоместува трошоците за погребување. Сепак, семејствата треба најпрво да платат, а потоа да ги чекаат парите назад. Сведоштвата на соселаните укажуваат на тоа дека станувало збор за семејство кое живеело во голема беда.