Поранешниот градоначалник на Карпош и лидер на партијата ГРОМ Стевчо Јакимовски е приведен и изведен пред судија на претходна постапка во Кривичниот суд во Скопје.
Приведени се уште две лица, вработени во општина Карпош. Обвинението е покренато од Основното јавно обвинителство, кое најави дека повеќе детали ќе соопшти во текот на денот.
Во истрагата на ОЈО се опфатени уште пет лица. Според најавите од ОЈО за тројцата приведени ќе биде побаран притвор, а за останатите мерки на претпазливост.
Во август минатата година, Јакимовски беше приведен и му беа изречени мерки на претпазливост откако Основното јавно обвинителство соопшти дека се сомничи дека заедно со четвроица соработници, злоупотребувајќи ја службената положба и овластувања го оштетиле буџетот на општината Карпош за вкупно 36.634.675 денари, овозможувајќи им да се стекнат со противправна имотна корист на правните лица Алконпроект во износ од 33.789.441 денари и С.М. Компани во износ од 2.845.234 денари.
На 23 август Финансиската полиција поднесе нова кривична пријава против Јакимовски и уште две лица од градежни фирми, товарејќи ги за бесправно градење.
Пријавите се поднесени поради демонтажа на две од старите општински бараки и нивно повторно поставување во дворот на основното училиште „Лазо Трповски“ во 2012 и 2013 година.