Според лидерот на Граѓанската опција за Македонија, Стевчо Јакимовски, СДСМ и коалиционите партнери вчера во Универзална сала одржале „реалити шоу“.
– Господинот Зоран Заев во изминатите шест месеци, го држи граѓанството на Република Македонија под тензија со наводните негови поседувања на снимки со кои ќе објави тежок криминал на владејачката гарнитура. Поточно, станува збор за најавите за тоа како се украдени пари во оваа држава, со снимки со кои ќе објави податоци за убиствата кај Смилковско езеро, и за тоа како во оваа држава се украдени фамозните 150.000 гласови. Колку што слушам, вчерашното „реалити шоу“ доживеало фијаско и колку што успеав да дознаам, објавувани се снимки со некои наводно мои разговори со директорот на УБК, нагласи Јакимовски.
Тој од седиштето на ГРОМ денеска потенцираше дела смета дека Заев „приказната ја започнал со тезата дека тој и опозицијата се прислушувани од страна на власта, а досега освен неговиот разговор со ќерка му, не видел ниту еден разговор на Заев“.
– Да потсетам, тој исто така е власт и тоа во локална самоуправа, и оттаму, не само граѓаните на Струмица, туку и сите имаат право да знаат за каков владател станува збор, рече Јакимовски.
Градоначалникот на Карпош вели му давал дозвола и овластување на Заев да го објави разговорот воден меѓу нив двајца на 14 февруари 2013 година, во 14.40 часот и исто така да ја објавел пораката која Заев му ја упатил во 01:30 часот по полноќ на 17 февруари.
– Првенствено заради тоа СДСМ да види за каков лидер станува збор. Она што мислам е, дека конечно, треба со оваа фарса да се привршува. Секаде во светот шпионите прво се апсат па потоа се води истрага. Ова премногу долго трае и сметаме дека надлежните судските органи во Република Македонија конечно треба да ги преземат чекорите кои треба, за целиот циркус што го прави господинот Заев конечно да заврши и да има институционална разрешница, надополни Стевчо Јакимовски.
Одговарајќи на новинарско прашање дали ја слушнал изјавата која била пуштена од Заев за него, лидерот на ГРОМ рече дека не ја слушнал, но снимките кои на криминален начин ги поседувал претседателот на СДСМ, требало да се расчистат во суд.
-Би било ред малку да го слушнеме и неговиот глас, односно како тој се однесува во приватни разговори и како ги условува другите етнички заедници во Република Македонија, изјави Стевчо Јакимовски, претседател на партијата ГРОМ.