Поранешниот министер за транспорт и врски, Миле Јанакиески и екс генералниот секретар на Владата на ВМРО-ДПМНЕ, Кирил Божиновски, од ноќеска се во притвор во истражниот затвор Шутка, потврдија од Кривичниот суд.
-Кривичниот совет на одделението за организиран криминал и корупција при Основниот суд Скопје 1 – Скопје, постапувајќи по предлог на Јавното обвинителствот за гонење кривични дела поврзани и кои произлегуваат од незаконското следење на комуникациите, за определување мерки за обезбедување присуство против М.Ј. и К.Б. опфатени во предметот со КОК бр. 7/18 од обвинителството означен како „Титаник“, по ценење на фактите и доказите во предлогот донесе решенија со кои го прифати предлогот и на двете лица им определи мерка притвор во траење од 30 дена заради постоење на основите од член 165 ст.1 точка 1. од ЗКП односно „ ако постојат други околности што укажуваат на опасност од бегство“, се вели во соопштението на Кривичен суд.
Јанакиески вчера за ТВ 21 изјавил дека најостро го осудува бегството на Никола Груевски, бидејќи како што рече, ќе влијае негативно на судските предмети во целост, а посебно во оние предмети каде сме заедно обвинети.
Јанакиески вчера рече дека не планира да бега од Македонија и дека моментално е во Скопје, најави и ќе се појави на денешното судско рочиште за предметот „Титаник“.
Тој бара од медиумите да информираат објективно и повика да се престане лицитирањето за идни притвори и притисок врз судот.