Поранешниот министер за транспорт и врски , Миле Јанакиески вечерва од затворот во Шутка е однесен во домашен притвор.
Според адвокатот на Јанакиески Еленко Миланов притворот му е заменет со домашен притвор по одлука на Апелацискиот суд, кој вчера на јавна седница ја разгледувал жалбата на одбраната за последното продолжување на 30 дневниот притвор.
Јанакиески на крајот од минатиот месец беше однесен во една скопска приватна болница поради здравствени проблеми, но лекарите одлучија дека не е потребна интервенција.
Две недели пред тоа Јанакиески беше во болница поради штрајк со глад, но по совет на докторите го прекина штрајкот и медицинскиот третман го продолжи во притворот.
Јанакиески до сега три пати беше во притвор во Истражниот затвор Шутка. Првпат беше пренесен на 14 ноември минатата година, еден ден по бегството на Никола Груевски, по налог на Специјалното јавно обвинителство каде е обвинет во пет случаи.
Вторпат беше пренесен во притвор по налог на Јавното обвинителство за организиран кримина и корупција во февруари каде е обвинет дека е еден од организаторите за нападот врз Собранието на 27 април. Тогаш во притвор беше нападнат од член на кумановската група осуден за „Диво насеље“.
Сега Јанакиески е во Шутка за аферата Шпански скали, каде се сомничи за злоупотреба на службената должност кога беше министер за транспорт, заедно со уште седум лица. Се истражува дали го оштетиле буџетот за 2,6 милиони евра со незаконска продажба на четири парцели државно земјиште во центарот на Скопје.