Во Кривичниот суд во Скопје денеска продолжува судењето за предметот „Титаник“ на СЈО. На денешното рочиште се слушаат необјавени бомби од март и април 2013 година за вториот круг за локалните избори.
Пратеничката Даниела Рангелова во телефонски разговор со ексминистерот за транспорт и врски, Миле Јанакиески, му вели за некоја вработена дека се колнела и плачела оти гласала на изборите, иако, според списокот што го добила, не излегла на гласање.
„Ќе ја запалам. Ќе ѝ е..м матер! Сто работи сум ѝ завршила“, вели Рангелова.
Во друг телелфонски разговор соговорничката на Јанакиески го прашува дали е запознат со идејата да им ги расипат лифтовите на денот на гласањето во Капиштец, во Центар.
„Ти се свиѓа тоа?“, го прашува соговорничката Јанакиески. Истиот муабет се повторува и во друг телефонски разговор од 1 април 2013 година, во кој повторно разговараат Јанакиески и соговорничка, која му вели: „Миле, а да им ги расипеме лифтовите на дел од зградите?“
Во друг разговор Јанакиевски се расправа со соговорник, кој „бил на баскет место да работи, да бара гласови за вториот круг во Центар“.
„А бе денес 12 институции завршив. Имам изработено цел систем за гласање, многу е добар, ама не е за по телефон. Со ’Зегин‘ е веќе зборено“, му рапортира соговорникот на Јанакиески.
На друг соговорник му препраќа мејлови со списоци од вработени што ги добил од Жарко Луковски од „Телеком“ со 2.000 луѓе, од Златко „Кадис“, од Јорданов „Макстил“.
Потоа ѝ се јавува на Елизабета Канческа-Милевска од која бара да ги свика уметниците од театрите, балетот и операта и да им каже да гласаат за ВМРО-ДПМНЕ, на што таа се согласува.
Во една од бомбите што беа пуштени денеска во судница, Јанакиески разговара со Сашо Мијалков, кој му вика на Јанакиески дека не треба по телефон да зборуваат за тоа, зашто не знае кој сè може да ги слуша. Јанакиески бара совет како да ги отвори пломбираните списоци, а да не се забележи.
„Ги стегнав шиптариве, ги стегнав циганиве. Бев со Тачи и со Адеми, ги наговорив сите нивни да излезат. Договорив со нив за секоја куќа да има по еден човек да ги носи на гласање. Со тоа: ’излезете гласање за тој и тој, видовме колку гласаа’. 400 да даде ДУИ, 400 Тачи и уште 700 ваму, ете ти ги 1.500“, вели Мијалков во прислушуваниот разговор.
Во бомбите Јанакиески исто така разговара со повеќе соговорници од кои бара да му ги достават избирачките списоци од Општина Центар, за да видат кој гласал, а кој не и да ги врбува за вториот круг на локалните во 2013 година.
„Избирачкиот список ќе ми го дадеш?“, вели Јанакиески, при што соговорникот му одговара: „Не, клуч треба првин да ми дадат“.
„Многу тешко е тоа и со претседателот зборев, зашто се 245 кеси“, му вели соговорникот, а Јанакиески потоа и кажува на соговорничка дека украле еден список на гласачи од Дебар Маало. Потоа на друг му кажува дека украле уште четири, ама им испаднале неколку.
Соговорник го предупредува дека тоа е кривично дело, па му предлага со скалпел да се пресечат во долниот дел.
Во „Титаник“ се обвинети поранешниот премиер Никола Груевски, Кирил Божиновски, Миле Јанакиески, Гордана Јанкулоска, Билјана Бришкоска Бошковски, како и Илија Димовски, Мунир Пепиќ, Едмонд Темелко, Леко Ристовски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска. Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.