Централниот комитет на ВМРО ДПМНЕ вечерва ги разреши од партиските функции потпретседателот Митко Јанчев и членот на ИК Констадин Богданов.
Како што веќе објави Нова ТВ вакво сценарио се очекуваше по шпекулациите дека ќе се бара оставка од претседателот на ВМРО ДПМНЕ Мицкоски.
– Едноставно имаме спротиставени визии со Претседателот за патот по кој треба да се движи партијата и развива државата. Разликите особено дојдоа до израз во последните неколку месеци кога се актуелизира Договорот од Преспа. Според мене, тоа беше, но и сеуште е, моментот во кој партијата требаше јасно и конкретно да ја покаже својата евроатлантска заложба.
Јас длабоко верувам дека Македонија ќе биде просперитетна држава, членка на НАТО и ЕУ преку Договорот од Преспа. Истовремено, се залагам и ќе се залагам за модерна народна партија во која неистомилениците нема да се исклучуваат од партијата – изјави за НоваТВ Богданов.
Дел од партиското членство изминатиов период отворено се спротистави на политиката која ја водеше партискиот претседател Мицкоски. Потпретседателот на партијата Митко Јанчев и членот на Извршниот комитет Костадин Богданов кои вечерва се разрешени гласаа против ставот на Мицкоски да се повика членството прикриено на бојкот на референдумот, а освен нив, на Референдумот гласаа и пратениците Даниела Рангелова, Драган Данев и Крсто Јовановски. Незадоволство кај дел од членството предизвика и ригидниот став на Мицкоски за Договорот од Преспа и интеграцијата во ЕУ и НАТО и покрај јавните повици од високи американски и европски лидери партијата да го преиспита својот став и да овозможи пратениците да гласаат без притисоци и уцени.
Партиските превирања се изразени и кај пратеничката група која е поделена на неколку фракции. Тоа е очигледно и по гласањето во петокот, но и по денешните реакции. Пратеникот Илија Димовско во писмена реакција кажа дека партијата се води кон изолација, а пратениците Трајко Велјановски, Антонио Милошоски и Владимир Ѓорчев го подржаа партискиот претседател. Според информации на НОВА ТВ, само дел од пратеничката група на ВМРО ДПМНЕ се сретнала денеска со американскиот заменик помошник државен секретар за Европа и Евроазија Метју Палмер кој немаше средба со партискиот претседател Мицкоски. Палмер имаше средби и со пратеници од опозицијата кои гласаа „за“ уставните измени во петокот.
По Референдумот, Мицкоски го разреши заменикот генерален секретар на ВМРО ДПМНЕ Петар Богојески кој повикуваше партијата да учествува, наместо да го бојкотира референдумот.