Согласно договорот за формирање на Специјалното јавно обвинителство (СЈО) утре е рокот до кога Катица Јанева треба да достави шестмесечен извештај за својата работа.
Специјалното обвинителство е обврзано на секои шест месеци да даде отчет до Собранието и Советот на јавните обвинители за активностите, вклучително и напредокот во истрагите.
Од Специјалното обвинителство за НОВА велат дека Иако немаат законска обврска, текстот од извештајот ќе биде испратен до сите медиуми, но нема да бидат споделени детали кои би наштетиле на истрагите или што се од доверлив карактер .
Специјалната јавна обвинителка Катица Јанева беше избрана на 15. септември согласно Договорот од Пржино. СЈО досега се прогласи надлежно за 34 предмети, вклучително и на предметот познат во јавноста како Пуч.
Кон крајот на декември, лидерот на опозицијата Зоран Заев соопшти дека материјалите од скандалот со прислушувањето што ги поседуваше опозицијата во целост се предадени на Специјалното обвинителство. Заев рече дека лично се уверил оти материјалите ќе се чуваат во сефови со технолошки стандарди и порача дека илјадници разговори на граѓаните се предадени во независна институција.
Јанева досега во повеќе наврати алармираше за што побрзо донесување на буџетот наменет за плати и надоместоци, за трошоци за време на постапките и целокупната работа на ова Обвинителство, но и на тоа дека Обвинителството се соочува со опструкции во работењето од повеќе страни.
Согласно финансискиот план, обвинителката побара сума од околу 4 милиони евра за непречено функционирање на нејзината работа за 2016. година. Собранието по жестока расправа ги одобри средствата, но пратениците од владејачката партија не ги штедеа навредите за Јанева.
Јанева досега јавно ја обелодени истрагата за случајот Титаник, во која екс министерката за внатрешни работи Гордана Јанкулоска, министерот за транспорт и врски Миле Јанакиески, секретарот на Владата на Република Македонија Кирил Божиновски, како и сите членови на Извршен Комитет на партија се осомничени за злосторничко здружување чија крајна цел била опстојување на власт на партијата.
Иако Јанева побара притвор за овие лица, вклучително и за градоначалникот на Пустец Едмонд Темелко и Исмет Гури – член на општинска изборна комисија во Чаир, ваквото барање Кривичниот суд го одби, а од Специјалното обвинителство најавија жалби.
Тимот на Јанева досега заработи и повеќе кривични пријави во кои се тврди дека обвинителите малтретирале лица во вршење на нивната служба.
Од СЈО ги отфрлија обвинувањата кои поред нив се неосновани, а Јанева најави и граѓански постапки за клевета и навреда за дел од медиумите, како и кривични постапки за лажно пријавување на кривично дело.
За време на шестмесечниот период од работа, Јанева првенствено бараше тим од 14 обвинители, а Советот и одобри 12. Подоцна, и самата Јанева соопшти дека уште две обвинителки се отстранети како вишок согласно досегашната динамика за работа, иако во јавноста се шпекулираше дека тие се отстранети поради издавање на информации.