Лицата од акцијата на МВР наречена „Пуч“, организирано дејствувале за по нелегален пат да извршат притисок врз Премиерот, изјави во вестите на Сител, министерката за внатрешни работи Гордана Јанкулоска.
– За првпат во историјата на независна Република Македонија истражните органи спречуваат обид за насилно уривање на уставниот поредок. Во кривичната пријава опфатени се четири лица на кои им се ставаат на товар кривични дела шпионирање, насилство врз највисоки претставници на државни институции и кривично дело помагање. Тоа се лица кои организирано дејствувале на употреба на одредени информации по нелегален пат за да извршат притисок врз претседателот на Владата на Република Македонија, наметнувајќи свои барања надвор од законските процедури да се формира техничка влада, ијави Јанкулоска.
Таа рече дена утрово добиле наредба за претрес на локација во Струмица, кој не бил деловен простор или дом поврзан со Зоран Заев.
Во однос на инволвираноста на Заев таа вели, му се става на товар делото насилство врз највисоки претставници на државни институции.
– Ова лице во 4 наврати на негово барање остварил средба со претседателот на Владата на Република Македонија од септември до ноември и на тие средби заканувајќи се со обелоденување на информации кои може да нанесат штета на поединци на високи државни позиции настојувал да издејствува промена на составот на Владата на Република Македонија надвор од демократски предвидените процедури и предвремени парламентарни избори, изјави Јанкулоска.
Министерката потенцираше дека се постапува по сите наредби од надлежните органи и зависно од текот на настаните ќе се постапува по сите добиени насоки.
– Ценејќи дека анализата на документите во форма на електронски записи кај првоосомничениот се документи кои се со класифицирана содржина, но и со податоци за следење на комуникации на незаконски начин, станува збор за нелегално прибавување на информации, бидејќи на ниту еден легален начин не можел и не смеел да ги поседува. Задоволни сме од материјалните докази во прилог на кривичната пријава и оставаме органите да одлучат по основ на силината на документите, дополни таа.