Поранешниот словенечки премиер Јанез Јанша и неговата сопруга Уршка Бачовник, се под истрага од страна на Канцеларијата за перење пари под сомневање дека со години и носеле големи количини на готовина на Наташа Пајенк, службеничка на Шпаркасе банката од Целје.
Наташа Пајенк е братучетка на Уршка Бачовник и готовината ја ставала на своја сметка, а исто така покрила повеќе од 10.000 € трошоци на Јанша и на неговата сопруга, меѓу другото, и при купување стан во Љубљана 2009 година, пишуваат медиумите во Словенија.
Јанез Јанша со месеци е во епицентарот на корупциски скандали, под сомнение дека нелегално дошол до повеќе од 200.000 евра.
Пролетта беше приведен пред Антикорупциската комисија, а потоа негираше дека нелегално се збогатил, но сепак, не успеа конкретно да објасни како со нивните минати приходи, успеале да се здобијат со толку многу богатство.
Неодамнешното откритие фрла сомнеж врз неговата атрактивна сопруга, лекар по професија.