Јапонија повторно има проблеми во Фукушима- од хаварисаната нуклеарка повторно истекле стотици тони загадена вода, која според мерењата, е високо радиоактивна, јавува Би-Би-Си.
Според информациите од фирмата која управува со атомската централа, Тепко, водата истекла од резервоар за нејзино ладење. Фирмата проценува дека станува збор за околу 300 тони вода, а дупката низ која таа истекува сеуште не е затворена. Водата не оди во Пацификот, туку во земјата. Сеуште се вршат истраги како се случило водата да пробие од резервоарот кој првично содржел околу илјада тони контаминирана вода.
Тепко соопшти дека во близина на резервоарите се измерени вредности на зрачењето од 100 милисиверти на час, ниво кое е штетно по здравјето на луѓето. Истечената вода, соопштува Тепко, содржи и штетен стронциум, метал кого научниците го нарекуваат „убиец на коските“ . Тој ја оштетува коскената срж и може да предизвика појава на леукемија.
Јапонската фирма Тепко нареди истрага за да се утврди дали истечената, со радиоактивни честички загадена вода, преку одводните цевки евентуално може да стигне до Пацификот.