Со оглед на лошата здравствена состојба, но и староста на Јованка Броз, како и тоа што лекарите не сакаат ништо да прогнозираат, јавноста почна да шпекулира за тоа каде треба да биде погребана вдовицата на Тито, кога за тоа ќе дојде време.
Многумина меѓу кои и внукот на Тито, Јошка Броз, сметаат дека вдовицата на Тито, доколку таа тоа го сака, треба да биде погребна во Куќата на цвеќето, односно покрај Титовиот гроб.
Јошка Броз за белградскиот весник Ало, изјави дека со децении не е во контакт со Јованка Броз и истакна дека нема ништо против, ако таа тоа го сака, да биде погребана покрај неговиот дедо.
„Ние не сме во контакт, па не знам ниту дали има и тестамент, ниту пак тоа каде има желба да биде погребана. Претпоставувам дека тоа можеби го знаат нејзините сестри, со кои е таа во постојан контакт. Лично немам против доколку таа сака да биде погребана до мојот дедо. Моите родители беа разведени па ги погребавме заедно, а таа беше и остана официјална сопруга на Тито“, изјави Јошка Броз.
Тој се сомнева дека тоа ќе биде можно: „Како што гледам сакаат и него да го одселат од таму“.
Мира Токановиќ, претседателка на Здружението на комунистите на Југославија во Србија изјавила дека ја познава другарката Јованка и другарот Тито.
„Имам само пофални зборови. Тие беа најскадниот и наубавиот пар. Таа беше неговата сила и поддршка во секоја смисла, а водеше сметка и за неговата безбедност. Сметам дека е големо злосторство тоа што другарите ги одвоија неколку години пред неговата смрт. Тешко ми е поради се што преживеа и што и се случи. Тоа не го заслужи. Се видовме на кратко пред неколку години, но и тогаш не беше добра со здравјето. Таа е храбра личност и за се што направи треба да и се оддаде признание и почитување“, рече таа за Радио Телевизија Црна Гора.