Шефот на Јавното обвинителство, Љубомир Јовески, сподели дека во изгорениот автобусот на „Беса Транс“ имало пластични канти наменети за гориво, но тие биле празни.
– Неспорно е дека имаше пластични канти наменети за гориво, но тие беа празни и не беа засегнати од пожарот, рече републичкиот обвинител Јовески во гостување на ТВ21.
На прашањето каде се наоѓале тие канти, Јовески рече дека кога тој пристигнал тие биле покрај возилото.
– Истражителите ми објаснија дека тие се наоѓале во еден простор, кој што во моторот на автобусот, под тој простор се наоѓа акумулаторот и над него биле сместени овие празни канти, рече Јовески.
Тој за несреќата отфрла било каква можност со поврзување на терористички акт.
– Слушнавте од обвинителот дека се исклучува можноста да станува збор за терористички акт. И тоа сигурно не го кажува од лични впечатоци, туку врз основа на извршена експретиза. Ако е терористички акт многу лесно се утврдува. Останува трага од експолозивот и на автобусот и на телата, вели Јовески.
Републичкиот обвинител открива дека според едни сознанија запалениот автобус сообраќал трет по ред од вкупните четири автобуса, а други сознанија се дека автобусот бил последен во редот. Но, сето ова ќе го утврдуваат бугарските истражни органи.
Јовески додаде дека очигледно не биле запазени сите процедури од агенцијата „Беса Транс – Скопје“. Иако обвинителството наредило да се заплени целата документација на превозникот, но тие ги известиле дека списоците ги немаат на писмено.
– Со самиот факт што автобусот ја напуштил територијата на Македонија без да има валидна документација, во делот на лиценцата, укажува дека до крај во рамките на дејноста на оваа туристичка организација не се запазувани сите процедури, рече републичкиот обвинител, Љубонир Јовески во гостување на ТВ21.