Иако денеска започна процесот на преземање на предметите на СЈО од ЈО, тоа не значи дека предметите физички ќе бидат префрлени во Обвинителството, туку тие остануваат во СЈО се додека јавниот обвинител не одлучи кој обвинител ќе постапува по нив, рече Љубомир Јовески за НОВА. Тој рече дека денеска само започнал процесот на предавање на надлежноста од СЈО на државното јавно обвинителство.
-Предметите по преземањето се оставени кај нив. Сите остануваат во СЈО. Денеска започна постапката на предавање на предметите од СЈО во надлежност на ЈО. Додека не се одреди кој обвинител ќе ги работи, ќе останат таму. Тоа се однесува на сите предистраги, истраги и предметите што се во судска постапка, рече Јовески.
Дали ова може да го одложи постапувањето по предметите, имајќи предвид дека судот ги одложува рочиштата?
-Не, бидејќи ние ги преземаме за да се обезбеди постапување по нив, вели Јовески.
Дали обвинителите од СЈО сега можат да продолжат да ги застапуваат предметите на суд?
-Во овој момент не, се додека не се преземе следниот чекор, а тоа е утврди стварната месна надлежност и не се определи обвинител што ќе ги застапува, вели Јовески за НОВА.
Што ќе се случи со обвинителите од СЈО?
-За обвинителите е надлежен Советот на јавни обвинители. Нивните функции во обвинителствата од каде што дошле се во мирување, вели Јовески, но не ја исклучи можноста, предметите на СЈО да ги преземат обвинители кои досега ги воделе.
Јовески најави дека до крајот на следната недела ќе ги распредели предметите на СЈО на обвинители.