Системот функционира, со исклучок на одредени проблеми и ситни работи кои се појавуваат, скоро беспрекорно, рече на денешната прес конференција, директорот на ЈСП, Игор Јанушев за проблемите во градскиот превоз.
Според Јанушев, најголема штета за превозот била направена со погрешното информирање на медиумите поради што граѓаните биле доведени во заблуда, додека системот функционирал речиси беспрекорно.
Како неточни и дезинформација ги отфрли информациите дека цените на билетите на ЈСП ќе се покачат од февруари. Според него, билетот повторно ќе чини 35 денари, додека рокот од 15 дена за билетите за 10 возења кои чинат 250 денари имаат рок на траење од 15 дена, исто како и претходно.
Тој на денешната прес конференција, апелираше до корисниците на градскиот превоз да не ги фрлаат неперсонализираните картички, туку истите да ги надополнуваат со средства во продажните места на ЈСП.
Во 2016-та година вкупно се продале 33 илјади картички и врз основа на тоа ЈСП правеле анализи колку картички треба да имаат подготвено за да се дочека 2017-та година, кога во системот се вклучија и приватните превозници.
„За таа цел беа спремни повеќе од 150 илјади картички, 30 илјади се продадоа во првите три дена на јануари. Не можевме ова да го очекуваме, ниту можевме да направиме анализа врз основа на претходно продадените картички од претходната година. До крајот на првата недела од јануари, бројот на продадени картички во следните денови се искачи на 80 илјади и заклучно со вчерашниот ден имаме продадено околу 140 илјади картички. Залиха на картички имаме и неколку пати во денот се доставуваат до сите продажни места“, истакна Јанушев.
Сепак ова не објаснува зошто во многу автобуси и продажни места одреден период се појави недостаток на картички за продажба, ако ЈСП има залиха на картички. Од компанијата Телеком, која исто така е вклучена во изработка на е-системот за градскиот превоз за НОВА потврдија дека тие изработиле 400 илјади електронски картички.
„На годишно ниво превезуваме повеќе од 50 милиони патници, повеќе од половината ланската година се возеле со е картичките и ги валидирале и надополнувале. Системот функционира и бројките и статистиките го покажуваат тоа. Секогаш, особено на почетокот нормално е да се појават одредени проблеми, бидејќи системот е многу комплексен и се она што се јавува како недостаток веднаш го отстрануваме“, рече Јанушев.
Ќе се плаќа и преку ОнеВип и онлајн
Тој за телефонското плаќање најави дека наскоро во системот ќе се вклучат и „ОнеВип“, откако во јавноста имаше жалби дека може да се плати преку телефон само со „Т-мобиле“. Наскоро според Јанушев ќе биде воведен и онлајн систем за надополнување на картичките.
По објавите во медиумите дека повеќе продажни места не функционираат, Јанушев се правдаше дека се работело за неколку исклучоци, околу пет или шест продажни места каде нема трансакции од разни причини.
„За да излеземе во пресрет ќе отвориме нови 81 продажно место во Скопје, со што вкупната бројка ќе се искачи на околу 160 продажни места каде граѓаните ќе може да купат или надополнат е-картичка“, додаде тој.
Тој информираше дека доколку некој ја изгуби персонализираната е-картичка, лицето треба да дојде во една од центрите на ЈСП Скопје да го пријави истото и да биде блокирана картичката. Средствата кои ги имал ќе може да ги користи на новата картичка, но за изработувањето на истата треба да плати 200 денари. Доколку изгубената картичка не е персонализирана, потребно е да ја чува фискалната сметка и исто така картичката може да се блокира и средствата да се запишат на нова картичка.
На прашањето на НОВА за тоа каде се наоѓа фирмата „Гентомар“ која го добила тендерот од ЈСП за да стане мастер дилер за продажба и надополнување на е-картичките за градскиот превоз, директорот на ЈСП одговори дека не знае каде се наоѓа фирмата.
„Фирмата не е моја, јас не знам која е фирмата, односно знам која е фирмата, но не знам каде се наоѓа или која е адресата на која може да ја најдете“, рече Јанушев.
НОВА претходно објави дека „Гентомар“ е тешко е да се пронајде на Интернет, како и на адресите кои за неа се достапни во Централниот регистар и Електронскиот систем за јавни набавки. Ја баравме на повеќе адреси кои ги посетивме, но не можевме да ја пронајдеме за да поразговараме за новиот е-систем кој го имаат автобусите. Ја нема ниту во телефонскиот именик, каде не може да се најде телефонски број за контакт.
Во две стории пишувавме за изборот на компанијата, проблемите во градскиот превоз и за тоа дека градот нема доволно пунктови за полнење на електронските картички со нови средства. Одговорни за поставување локации на кои граѓаните ќе може да купат или надополнат автобуски билети се „Телеком“ и мистериозната „Гентомар“, кои добија тендери од ЈСП за новиот е-систем.