Од денеска, понеделник, во билетарниците и центрите за персонализација на ЈСП Скопје е пуштен во продажба дневен билет кој чини 120 денари и важи за повеќекратно користење на сите линии во текот на еден ден. Новиот тип на билет важи од 05 до 24 часот, со можност за неограничен број возења, односно префрлувања на сите градски и приградски линии. Како што соопштуваат од претпријатието патникот има обврска да го отчука билетот на постоечките валидатори во секое возило во кое ќе се префрла.
Билетот се воведува со цел да се овозможи подостапно и полесно користењето на јавниот превоз на оние патници кои имаат потреба од повеќекратно користење на јавен превоз во текот на еден ден, а не поседуваат електронска картичка „Скопска“, тоа се туристи, граѓани од внатрешноста, и граѓани кои инцидентно имаат потреба од јавен превоз. Од ЈСП додаваат дека цената на сите останати билети останува иста.