Пратеникот на Германскиот Парламент, Јосип Јуратовиќ денеска пред штабот на СДСМ на Бихаќка изјави дека очигледно е дека во Македонија се кршат основните човекови права и изрази загриженост за политичката ситуација во земјава.
-Очигледно е дека овде се кршат основните човекови права. Бидејќи Македонија е демократска земја која е на патот на Европската Унија, за нас во Германија, но и во Европа е многу важно да се почитуваат човековите права.
Знаеме што се случуваше во последно време а пред нас се и протестите, односно демонстрации по прашањето на борбата за функционалност на една држава којашто се базира токму на демократските вредности, односно на слободи и човекови права. Дојдов да видам каква е ситуацијата, разговарав и со синдикатите денеска, со претставници на синдикатот, коишто како граѓани на Македонија исто така се силно загрижени од ситуацијата.
Од страната на синдикатот ми сигнализираа дека можеби некој повеќе или помалку јавно ќе се ангажира, но, во секој случај мислењето на синдикатите и работниците е дека моменталната ситуација во Македонија се однесува и на нив, односно на сите граѓани без разлика на социјалните разлики, без разлика на националното потекло. На крајот сите имаат исти проблем, а тоа е пред сè како ќе функционира оваа земја. Затоа што во однос на функционалноста и прашањето за демократските вредности зависи иднината на оваа земја и на економски и на социјален план, изјави Јуратовиќ.
Јуратовиќ е исто така член на одборот за надворешна политика, одговорен за Југоисточна Европа и задолжен за соработка со синдикатите во Социјалдемократската партија во Германија.