Утврдени се три случаи на грип од типот А Х1Н1, се работи за деца на возраст од 13 години од Тетово, соопшти денеска во Институтот за јавно здравје.
Децата биле амбулантски прегледани, а нивните примероци земени од екипите на Центарот за јавно здравје – Тетово биле испратени на анализа во лабораторијата на Институтот за јавно здравје на Република Македонија.
Примероци од уште три лица од Тетово со симптоми на грип биле испратени во лабораторијата на Институтот, но кај нив лабораториски не е потврдено присуство на грип.
– Во Европа бројот на анализирани случаи е многу мал. Од вкупниот број на пристигнати примероци во европските лаборатории 71 процент е инфлуенца А, 45 проценти е Х1Н1, 55 проценти е Х3Н2, а 29 отсто отпаѓа на инфлуенца Б, изјави Голубинка Бошевска од Институтот за јавно здравје на Република Македонија.
Од Институтот велат дека случаите на грип се во пораст, неделно се пријавуваат по околу 60 нови случаи, а вкупно досега се регистрирани 432 случаи, најмногу во Скопје, Струмица, Тетово и Куманово.