Првите партиски избори на Републиканците и Демократите во Ајова резултираа со победа на тексашкиот сенатор и тврдокорен конзервативец, Тед Круз пред милијардерот Доналд Трамп со 28 проценти од гласовите наспроти 24.
Кај демократите Хилари Клинтон и Берни Сандерс се речиси изедначени. Клинтон доби 49.9, а Сандерс 49.4 проценти од гласовите.
Шоуто во Ајова неминовно го отвори прашањето за сите оние кои не се од САД – кој е принципот на гласање?
Прво, важно е да се знае дека во САД кандидатите на Републиканците или Демократите најпрво се натпреваруваат во партиските редови, а дури потоа победникот се трка за функцијата претседател на САД во име на својата партија. Гласањето за кандидат во партијата почнува февруари и трае пет месеци, а Ајова е секогаш првата држава во која се одржува партиското гласање.
Американските држави имаат два начини на бирање кандидат за секоја партија и собирање на гласовите на партиските членови кога се бира кандидатот – „primary” и „caucus”.
Ваквиот процес на бирање, никогаш не бил вклучен во Уставот на САД туку настанал од политичките партии. Во некои земји има само „primary“ систем на гласање, во некои само „caucus“, додека во други има комбинација од овие два начина. Се одвиваат од јануари до почетокот на летото, неколку месеци пред изборите во ноември.
„Primary“ се јавни избори организирани од државните или локалните претставници додека „caucus“ се приватни настани кои ги организираат самите партии, а и двата претставуваат еден виде индиректни избори за својот кандидат – наместо гласачите директно да избираат една личност која ќе се трка за претседателски кандидат, тие одлучуваат колку делегати партијата ќе има во дадената држава, а тие потоа одлучуваат за номинација на еден од кандидатите.
Ајова и Њу Хемпшир се првите две држави кои играат важна улога при популарноста на кандидатите во однос на тоа кој кандидат води. Ајова користи „Caucus” систем, додека Њу Хемпшир “Primary”. И покрај тоа што овие две земји опфаќаат мал број на гласачи, сепак, тие традиционално влијаат врз „кармата“ на секој кандидат. Американците велат дека имаат моќ да ги предвидат изборите, додека познавачите тврдат дека првите победници неминовно влијаат на тоа луѓето понатаму психолошки да сакаат да се приклонуваат кон победникот.
По Ајова следен е Њу Хемпшир. Едно е сигурно, за демократите ова ќе претставува уште една неизвесност бидејќи тие практично не произведоа победник во Ајова. Претходно, Берни Сандерс водеше на анкетите во Њу Хемпшир, но тоа засега не значи ништо.