Вицепремиерот за евроинтеграции Фатмир Бесими од петок започнува серија дипломатски средби низ европските престолнини. Во Лондон, Брисел, Париз, Мадрид и Даблин Бесими ќе убедува земјите членки за добивање датум за преговори пред самитот во Јуни. Тој и неговиот тим ќе им ги презентирале и објаснувале резултатите од реформите на Македонија.
Сепак, Бесими не даде одговор со кои аргументи ќе ги брани успесите на земјава во сферата на слободата на медиумите и добрососедските односи.
Во однос на проблемот со името, Бесими рече дека секој ден сме биле се поблиску до решение.
-Секој ден сме се поблиску. Многу поблиску отколку во 1995, рече тој.
Бесими рече дека тој лично е за решение на името, но истакна и дека е многу важно што поскоро да биде формирана анкетната комисија за расчистување на настаните од 24 Декември и упати апел до политичарите да заборават на теснопартиските интереси и да направат поголеми напори за конечно решение. Запрашан дали откажувањето на самитот на ПСЈЕ од страна на претседалот Ѓорѓе Иванов ќе влијае врз аргументацијата за добрососедските односи, тој практично не одговори, туку само го образложи одговорот кој го добил од МНР, а кој се однесува на процедурите околу самитот.
-Како што знаете имаме предлог закон за медиуми и расправата за законот беше продолжена на два месеца, рече Бесими во обид да презентира аргумент со кој ќе прикаже како земјава се справува со проблемите во сферата на медиумите.
Присутните новинари на брифингот реагираа дека тоа е далеку од аргумент дека работите со медиумите тргнале на подобро и бараа поконкретен одговор за тоа како министерот ќе презентира некаква добра волја или напредок во однос на членот 29 од резолуцијата каде критиките на адреса на медиумите се сериозни, Еве како се одвиваше дијалогот помеѓу вицепремиерот за евроинтеграции и присутните новинари кои беа заинтересирани за оваа тема.
-Министре, во ред е ова со законот за медиуми, неколку пати го повторивте, но јас ве прашувам друго. Кажете ми што вие ќе презентирате како напредок во однос на забелешките за владините реклами како форма на поткуп, автоцензурата, независноста на јавниот сервис , знате претпоставува сте ја читале резолуцијата?, гласеше новинарското прашање.
Одговорот на Бесими индиректно укажа дека вицепремиерот нема аргументи да се брани.
-Знаете што, јас и да имам само еден аргумент од десет, ќе морам да го користам тој, кусо одговори Фатмир Бесими.
Исто така, тој изјави дека текстот за новиот закон на медиуми веќе е испратен на експертиза во Советот на Европа и ОБСЕ.
Во текот на престојот во Брисел кој е дел од дипломатската офанзива на вицепремиерот за евроинтеграции, тој преку писма ќе бара средби и со европратениците кои гласале против или воздражно за Резолуцијата за Македонија, а средбите би се реализирале на најавената Конференција на ЕП “Од сон до реалност” посветена на реформските процеси.