Во тек се подготовките за чување и пребарување на материјалите стекнати од незаконското прислушување кои се наоѓаат кај лидерот на Социјалемократскиот сојуз (СДСМ), Зоран Заев, велат за НОВА одд специјалното јавно обвинителство.
„Се подготвуваат физички услови за чување на материјалите, софтвери за пребарување за коишто се обучува и кадар и се издаваат безбедносни сертификати за луѓе и тоа е процес кој скоро ќе заврши. “, велат од специјалното обвинителство додавајќи дека Зоран Заев има законска обврска да ги предаде материјалите, а тие во следните денови ќе информираат детаљно за овој процес
Според Договорот од Пржино, предавањето на прислушуваните разговори требаше да се реализира до 30 ноември годинава. Откако рокот истече и оваа обврска не беше реализирана, провлаадините медиуми шпекукираа дека Зоран Заев одбива да ги предаде материјалите. Тој во неколку наврати изјави дека „материјалите ќе бидат предадени тогаш кога за нив ќе биле создадени услови“.
Специјалното обвинителство гарантира дека материјалите ќе бидат чувани со највисок степен на безбедност и дека ќе постои сериозна селекција кој се ќе има пристап до тие материјали.
Во меѓувреме, јавното обвинителство отвори случај за аферата „Фабрика за лични карти“ и вчера на прес конференција соопшти дека во компјутерите на лицата затекнати во станот каде што наводно се изработувале документите се пронајдени десетици илјади телефонски разговори. Медиумите блиски до власта повикувајќи се на извори од истрагата пишуваа дека овие разговори биле од „бомбите“ на Заев, додека јавното обвинителство се уште не посочило кои се овие разговори и дали овие снимки се од бомбите, ниту , пак, одговори зошто нема кривични пријави против лицата затекнати во „фабриката за лични карти“.
Аферата отвори сомнежи околу тоа како се чуваат „бомбите“ во седиштетот на СДСМ. НОВА побара од СДСМ да појасни како се грижат за безбедноста на материјалите и дали снимките најдени во компјутерите се дел од „бомбите“.
„Безбедноста на материјалите што ги поседуваат СДСМ е загарантирана, а што се однесува до материјалите за кои што зборува обвинителството, чекаме истрагата да покаже чии се и од каде се тие снимки“, велат за НОВА од СДСМ.