Гертруда е една заоблена, весела свиња, која грокта гласно и самозадоволно, додека се прпелка и оптегнува низ калливите патеки на славата. Драгата таа-веќе два месеци во главата има вградено компјутерски чип, голем како една паричка. Идејата на иноваторот Илон Маск е крајно едноставна- да се поврзе човечкиот мозок со Интернет, а за тој потфат, барем на почетокот, му беше потребна токму нашата Гертруда.
Таа е родена со сериозна мисија да ја смени историјата на светот. О, секако, тоа нејзино тромо одење и на секој час потседнување за да одмори, всушност е прилично инспиративен и возбудлив живот. Кој да знае дека и така може да изгледа еден свински живот.
За разлика од многумина од нас, таа е атрактивна комбинација на гениј и безработник, и да, таа веќе откако е родена, на нас гледа со презир и потсмев. Тоа сме ние за неа- повеќето од нас одбивни мрзеливци, неупотребливи битија, бескорисни влекачи, некадарни да и пружиме каква било корисна информација што ќе го нахрани нејзиното иноваторско его.
Некаде на другиот крај на светот, во Македонија, една друга иновација, сосема различна од онаа на Гертруда, е усовршена до беспрекорност. Тоа е проект кој трае веќе повеќе од една деценија- создавање и негување на стотици илјади мозоци на гигантската администрација на една мала и млада земја, која не може да го издржи тој товар на плаќање за нивниот траен инвалидитет- бескорисноста.
Токму заради нивната огромна бројка, бирократите низ деценијава создале беспрекорен механизам на самоодржливост и неуништливост. За тие потреби, имаат исто така вградено чип, но за разлика од Гертруда, тој е исклучен од сите фреквенции, штекери и жици со надворешниот свет.
Но, и нивниот сопствен, внатрешен свет не е поврзан со ниту една стабилна база, ниту пак имаат постоечки систем, а ниту некаков, барем маглив концепт- за што воопшто се присутни, кога се така, дури до болка, видливо отсутни.
Чипот кој самите го конструирале, со помош на партискиот апаратус, всушност постои за да се стори се за тие да не постојат. Практично, тој служи за да се овозможи нивната невидливост, сеедно дали се физички присутни или рамковно отсутни, тоа не ви менува ништо, затоа што секогаш имате совршено изградено чувство дека не постојат.
Затоа, деновиве прочитав, се најавува вмрежување на сите комјутери во земјава, од сите институции, потфат на новата Влада на Заев. На тој начин, администрацијата и во исто време и граѓаните ќе ги добиваат веднаш сите потребни информации, со само еден клик на компјутерот.
Но, знаете и сами- ништо не оди така мазно и брзо, секако не во оваа земја. Штета, навистина штета- нашава администрација, дури да дознае за сопствениот нов живот во кој компјутерското поврзување ќе стане реалност, се ќе се смени.
За тоа време, Гертруда одамна ќе замине во вечноста, ќе почива во мир, благодарна на 21. век, во кој допринела некој гениј како Илон Маск да биде награден со Нобелова награда за револуционерно откритие.
Ви велам, не секоја Гертруда треба да се гледа како одбивна, трома и презрена свиња. Затоа што, таа не е обична свиња, од оние нам добро познатите. Таа не го сфатила животот како каллив проток на поминување на времето, во кое смислата се гледа ништо да не се прави, ништо да не се чини. Поинаку, се знае што следува- само може да се добие навреда дека некој е обична бескорисна свиња, и ништо повеќе од тоа. А Гертруда секако тоа не го заслужува.