Воодушевени од изненадувачки брзата реакција на Секторот за Внатрешна контрола при Министерството за внатрешни работи, а по сугестија на корисници на социјалните мрежи, НОВА се обиде да пресмета како изгледало испрашувањето на 34 припадници на специјалните единици на полицијата од страна на одговорните во Внатрешна контрола. За таа цел ви доставуваме хронологија на настаните.
14:30, 21.05.2014
Новинарките Сашка Цветковска од НОВА, Мери Јордановска од ФОКУС и Марија Митевска од Радио Слободна Европа влегуваат во просториите на Секторот за внатрешна контрола при МВР со цел да пријават насилно бришење и притисок за бришење на видео и фото материјали од страна на припадници на полицијата во вторникот навечер за време на немирите во Ѓорче Петров, како и одбивање од страна на полицијајците да се легитимираат.
14:40 – 15:00
Новинарките разговараат усмено со двајца службеници. По разговорот се прашани дали сакаат да поднесат усмена преставка на лице место или писмена. Новинарките одговораат дека ќе поднесат веднаш усмена преставка.
15:00 – 15:50
Еден од службениците почнува да ја куца пријавата, односно да ги внесува изјавите на новинарките. Другиот службеник подоцна ги проверува, по што пријавата се печати и сите се потпишуваат на истата. Службеникот информира дека Секторот за внатрешна контрола работи секој ден од 08 до 16 часот, време во кое можат да донесат дополнителни докази доколку имаат. Службеникот, исто така, не информира дека за исходот од преставката ќе дознаеме по пошта на домашна адреса. Додава дека истрагата може да трае и до еден месец.
15:39 22.05.2014
Пристигнува елеконтронска пошта од МВР со која се известува за исходот од истрагата на Секторот за внатрешна контрола во која се вели дека се испрашани вкупно 34 полицајци и дека нема докази за такви случувања
По сугестија на активисти на социјалните мрежи, НОВА го провери ворд документот кој беше испратен од страна на полицијата. Кога отворивме во секцијата properties, а потоа и во general, откривме дека документот е креиран во 12:50 денеска од страна на Ivo Lj Kotevski. Во 13:50 e модифициран, исто така, од страна на Ivo Lj Kotevski.
Направивме пресметка, во случај да се почитувало работното време на Секторот за внатрешна контрола, за да видиме со која брзина се испрашани 34 полицајци. Еве го нашето претпоставено сценарио.
08:00
Секторот за внатрешна контрола отвора и веднаш се фрла на работа. 34 полицајци се наредени во ред и чекаат да бидат испрашани. Под услов истите да биле лоцирани и повикани претходниот ден, но под услов Секторот за внатрешна контрола да работел прекувремено или пак, во оние луфта 10 минути до крајот на работното време кога новинарите си заминаа да успеале да го организираат ова групно земање искази.
08:00 – 12:00
Службениците од Секторот за внатрешна контрола ако работеле по двајца како во случајот со новинарите, би им требале 7 минути за да испрашаат и да креираат писмен исказ за еден полицаец.
12:00 – 12:30
Во овие 30 минути претпоставуваме дека Секторот за внатрешни работи успеал да состави записник и да ја затвори истрага, да креира некаква писмена одлука за исходот и истата да му ја испрати на помошникот министер за односи со јавност внатрешни работи Иво Котевски, под претпоставка дека Ivo Lj Kotevski е истото лице како и помошник министерот Котевски.
На Иво Котевски или на Ivo Lj Kotevski веројатно му се доволни 20 минути до 12:50 за да ја креира првата верзија на јавното соопштение, а подоцна и да ја промени. Од последната промена во 13:50 од незнајни причини се чекало да дојде 15:49 за МВР да го испрати соопштението до јавните гласила.
Се разбира, можно е и друго сценарио во кое Секторот за внатрешна контрола работел цела ноќ без престан, а на располагање биле сите човечки ресурси и така успеале од истрага која може да трае и до 1 месец, да завршат работа за точно 24 часа.