Не ми чепкајте во идентитетот, не ми чепкајте во груевизмот, тоа е мојот примарен, единствен, само мој идентитет. Тоа е се што имав, се што ми остана, што не смее да се жртвува.
Ќе ви речат оние кои ги уриваа и сотруваа вистинските споменици на идентитетот, градејќи нови, мислеа поубави, затоа и беа повисоки, пограмадни, застрашувачки.
Тоа беа споменици на културата на груевизмот- идентитетот беа криминалот, корупцијата, злоупотребите, финансиските и сите други малверзации, непотизмот, нерешените самоубиства, политичките затвореници… продолжете сами, допишете ја сета историја на пустошот кој го оставија зад себе.
Тоа беше нивниот идентитет- идилична храна на национализам која ја нудеа и продаваа како патриотизам, херојство, во комбинација со идолатрија на Груевски. Притоа финански поткрепени, живнати, спокојни, манипулираа и се изживуваа со неспокојот, со стравовите, со незнаењето и конфузијата околу идентитетот, големата македонштина.
Сега повторно се вадат на маса истите шаховски фигури- сеедно што над нив демнее опасност тие да бидат разиграни низ некои затворски ќелии.
Откако рефeрендумот е на таа иста маса, на цена станува повторно груевистичката пропаганда- манипулацијата, лагата, изигрувањето, подигрувањето со чувствата на оние кои не знаат, не разбираат, на оние кои стравуваат, на сите оние кои се на овој или оној начин повредени во ерата на груевизмот и не веруваат никому, легнуваат и се будат со сомнежи, со дилеми, со преиспитувања, оние кои прекопнале од сета таа неизвесност.
Лагите и манипулациите кои ги сервираат се истите оние чиј идентитет го осознавме- коруптивен, криминоген, неморален: дека со Договорот со Грција се одзема идентитетот, а наспроти тоа се фактите, погледајте ги фактите: јазикот останува македонски, националноста/државноста- македонска/ граѓани на Република Северна Македонија.
Со решавањето на споровите со соседите, со најавите на започнување на преговори со ЕУ, со поканата за НАТО, навистина има нешто и загрозено. Тоа е груевистичкиот идентитет секако, но на тоа ние се надевавме, ние силно се надевавме токму на тоа, најмногу на тоа.
Фото: МИА – Судење на Груевски за случајот ТНТ