Специјалното јавно обвинителство е соочено со неколку сценарија доколку изборите се одржат на 5. јуни – можноста за негово укинување, продолжување на опструкции или нови кривични пријави врзани со скандалот со прислушување.
По бетонираниот став на власта за избори на 5. јуни и најавен бојкот на изборите од страна на опозицијата, дел од аналитичарите кои ги консултираше НОВА сметаат дека Уставниот суд мора да ја има „на ум“ политичката состојба, а Специјалното обвинителство, без разлика на се да продолжи со постапките.
Засега, ниту претседателот на Светскиот македонски конгрес – Тодор Петров ги повлекува иницијативите за оценување на уставноста на Специјалното обвинителство, ниту Уставниот суд ги разгледува.
-Пред Уставниот суд се четири иницијативи за поништување на Законот за специјално обвинителство, за поништување на измените во Законот за Влада и за поништување на некои одредби од Законот за заштита на приватноста и Изборниот законик – сите донесени врз основа на Договорот од Пржино. Иницијативите ги поднесовме за Уставниот суд веднаш да ги поништи наведените закони, а не да остварува други интереси, освен она за што постои – да ја оценуваат согласноста на законите со Уставот! Тоа бараме судот да го стори веднаш, вели Тодор Петров за НОВА.
Ваквата состојба би можела да трае со години, а би можела да се реши уште на следната седница, бидејќи судот нема законски рокови до кога може поднесените иницијативи да се разгледаат.
Се зависи од судијата известител кој работи на предметот и кога тој би предложил иницијативата да се стави на дневен ред на Уставниот суд.
Според поранешниот јавен обвинител Јован Трпеноски, судбината на ова обвинителство ќе зависи од нивната работа. Тој смета дека колку повеќе СЈО го стега обрачот околу осомничените, толку поверојатно е да се притисне за негово укинување.
-Да надвладее разумот. Се знае дека иницијативата до Уставниот суд е поднесена со цел да се елиминира Специјалното обвинителство, бидејќи факт е дека колку повеќе напредува со истрагите, толку поголем е стравот кај оние кои смета дека си ја знаат вината. Би било преголем залог на Уставниот суд да го прогласи за неуставно Специјалното обвинителство, бидејќи тоа е резултат на Договор на четирите најголеми политички партии. Јас верувам дека со оваа иницијатива Уставниот суд ќе оди повнимателно и дека конечно ќе проработи разумот и објективноста кај мнозинството судии, вели Трпеноски на НОВА.
Поранешната судијка во Европскиот суд за човекови права во Стразбур, Маргарита Цаца – Николовска оценува дека опструкции врз СЈО и понатаму ќе продолжат, но според неа, влева надеж тоа што Обвинителството има силна поддршка од меѓународната заедница.
-Се е возможно со ваков состав на Уставниот суд. Очекувам и натаму опструкции, тоа е некаква тенденција врз СЈО, но обвинителите се свесни и знаат која е нивната позиција, но и до кога е нивната работа, така да би повикала реперкусиите да престанат, вели Николовска.
Специјалното јавно обвинителство се формираше со Договорот од Пржино со цел дскандалот со незаконското прислушување да добие разрешница, но и кривичните дела кои произлегуваат оттаму.
Неделава, ниту опозицискиот лидер Зоран Заев, ниту претседателот на ВМРО-ДПМНЕ Никола Груевски не сакаа да дадат конкретен одговор дали Договорот од Пржино е мртов, иако двете страни имаат спротивставени ставови околу датумот на изборите.
Од Специјалното јавно обвинителство без оглед на се велат дека продолжуваат со нивната работа како и досега и не би ги коментирале иницијативите за нивно укинување.
Досега оттаму обелоденија три истраги, и тоа предметот „Титаник“ – поврзан со изборните нерегуларности, случајот „Тортура“ за нечовечко апсење на Љубе Бошковски од страна на алфите, како и предметот наречен „Тврдина“ за незаконско уништување на опрема за прислушување во вредност од 10 милиони евра.
Во досегашните предистражни постапки на СЈО осомничени се низа сегашни и екс – функционери од владејачката партија.