-Четири години имаме чесно партнерство … иако дојдовме од различни политички семејства, изјави грчкиот премиер Алексис Ципрас, коментирајќи ја соработката на неговата партија со независните Грци (АНЕЛ) и Каменос, истакнувајќи дека ја прифатил оставката.
Тој му се заблагодари на Каменос за неговиот „незаменлив” придонес во ова време.
Ципрас објави дека веќе контактирал со претседателот на грчкиот Парламент и побарал од него да започне постапка за гласање доверба на Владата, за да може да го заврши својот мандат што му истекува во октомври 2019 година.
Токму донесувањето на уставните измени во македонскиот парламент, беше главна причина Каменос да ја напушти коалиционата влада, бидејќи уште претходно изјавуваше дека за него спогодбата од Преспа е неприфатлива.
Договорот од Преспа, Каменос рече дека не е ништо друго освен прелиминарен договор, што е противуставен, бидејќи не е потпишан од претседателот.
Повторно го спомена и неговиот предлог и во Грција да се одржи референдум, односно како пример рече, заедно со евроизборите да има една гласачка кутија плус за Договорот од Преспа.
На прашањето на МИА, која е неговата проценка дали Договорот од Преспа ќе помине во грчкиот Парламент, Каменос не даде јасен одговор, додека во однос на тоа дали Независни Грци би го поддржале протоколот за наше членство во НАТО, кусо и категорично одговори „не“.
На прес-конференцијата одржана во хотел во центарот на Атина, присутни беа четворица пратеници на Независни Грци, а отсуствуваа министерката за туризам, Елена Кундура и заменикот министер за земјоделство Василис Кокалис.