Британскиот премиер Дејвид Камерон изјави денеска дека ја подржува и ја поздравува одлуката на официјален Вашингтон за спроведување американски воздушни напади врз позициите на милитантните исламистички групи во Ирак.
Во своето специјално соопштение, Камерон вели дека „светот мора да им помогне“ на религиозните малцинства на ирачка територија, кои се изложени на сериозна закана од милитантните исламисти.
Светот мора да биде со овие луѓе во нивните часови на очајничка потреба за помош, се вели во соопштението на британскиот премиер.
Во него се истакнува дека Камерон побарал од министрите и функционерите во владиниот состав да ги испитаат начините како Велика Британија ќе може да помогне.
Портпаролот во Кабинетот на премиерот во Даунинг стрит 10, сепак, ја отфрли можноста за директно британско воено учество во најавените воздушни напади.
– Не се планира британска воена интервенција во Ирак, изјави портпаролот.
Припадници на џихадистичката група ИСИЛ вчера го освоија местото Карагош во североисточен Ирак, кој важи за најголем христијански град во земјата. Навлегувањето на џихадистите во градот предизвика масовно панично бегање на локалните христијани, па дестици илјади лица побараа засолниште во планинските реони северно од Карагош.
Постои стравување дека овие луѓе се соочени со заканата од изгладување и дехидрација, доколку останат подолго време во реонот на планината Синџар, без храна и вода или дека може да бидат масакрирани од припадниците на ИСИЛ.