Агресивната кампања на партиите во предизборието во Македонија длабоко навлегуваат во приватноста на граѓаните.
Директни повици на мобилен телефон и СМС пораки се испраќаат до секого независно од возраста и во било кој дел од денот.
„На телефонот од ќерка ми се јавија од ВМРО – ДПМНЕ за да не известат за времето за одржување на митингот“, раскажува една загрижена мајка за повикот кој го добиле на мобилниот на нејзината осумгодишна ќерка.
„Кога ги прашав од кај им е овој број ми одговорија дека ме имало на списокот. Прашав, вели мајката, од каде им е списокот, ми рекоа – од општина“.
Другиот пример, за кој во НОВА не известија граѓаните, е СМС порака од СДСМ со следнава содржина: ВМРО-вците во пресрет на денешниот митинг делат пропаганден материјал, пред нашите станови и куќи. Ве молиме излезете и исчесте. Испрати ја оваа порака на уште 10 луѓе ако мислиш за доброто на Македонија.
Ученици облечени во маици со ликовите на кандидатите за градоначалници навиваат секој за својот фаворит, ова е атмосферата деновите во основните и средните училишта низ Македонија.
„Училиштата и градинките потребно е да не дозволуваат присуство на било каков пропаганден материјал, бидејќи се развива чувство на реваншизам и национализам меѓу децата“, вели за НОВА, Јана Зенговска, психолог во првата детска амбасада „Меѓаши“.
„Кај децата се развива чувство дека се застапници на одредени партии“, смета Зенговска.
Еден светол пример во целиот галиматијас на предизборието се неколку детски градинки каде воспитувачките им забраниле на децата да ги носат на раце нараквиците со партиски пораки.