Локалната самоуправа на Општина Прилеп и здружението „Прилепски мечкари“ по 14-ти пат го организираат меѓународниот карневал „Прочка“.
„Во Прилеп на Прочка, демоните од под земја ќе допатуваат. По улици и сокаци ќе шетаат, ќе плашат минувачи, откуп за живот ќе бараат, со стапови ќе маваат, секој удар еден плод и блосоење за бериќет и род. Да нѐ потсетат на минливоста на животот и повторното раѓање“, порачуваат организаторите на меѓународниот карневал „Прочка 2015“.
На карневалот „Прочка 2105“ учество ќе земат околу 1.000 учесници во групни или поединечни маски од Србија, Хрватска, Албанија, Бугарија, Турција и Македонија.
„Дефилето започнува со „Прилепските мечкари“, традиционална маска иницирана од касапите кои ги негуваат старите обичаи. Пред граѓаните и гостите од FECC мечкарите ќе го изведат ритуалот со кој се бркаат злите духови, во очекување на плодна и бериќетна година“, вели советникот за култура во прилепската локална самоуправа Снежана Ристеска.
Во рамките на„Прочка 2015“, вчера во центарот на Прилеп парадираа жонглери, акробати, кловнови, мечкари и мажоретки, а во Центарот за култура „Марко Цепенков“ се одржа ликовна изложба на цртежи-маски кои ги изработија учениците од основните и средните училишта од Општина Прилеп, при што на најуспешните им беа доделени и награди.
Со одлука на Советот на Општина Прилеп, за време на карневалот работното време на угостителските локали е продолжено за 2 часа, а за влез во сите кафетерии и дискотеки гостите задолжително треба да носат маска.
На годинешното издание на „Прочка 2015“ организаторот ќе ги награди најдобрите во категориите традиционална маска, современа групна маска, поединечна и детска маска, како и Гран-при наградата за најмаска.