Не само што нема да може да ја подигне својата пензија, туку Јордан Настески, човекот кој легнувајќи на улица пред општинската зграда во Прилеп го сврти вниманието на јавноста, сега ќе мора да плати казна за недолично однесување во висина од 100 евра.
Настески е револтиран од односот на полицијата, која откако интервенирала и го отстранила од улицата каде Јордан лежеше во знак на револт против блокираната сметка, четири часа го држела во Полициската станица во Прилеп.
„Ме однесоа во станицата, од 12 до 16 часот таму ме држеа. Ме внесоа во една канцеларија, му кажав како е работата. Ми велат, не смееш ред и мир да нарушуваш. Му велам, јас сакав самоубиство да извршам а не протест да правам. Имаш ти пари да му однесиш на децата леб дома? Јас немам, не можам да си одам дома“, вели пензионерот од село Галичани, Јордан Настески.
Како што вели, најмногу го изреволтирало тоа што кога побарал прием кај прилепскиот градоначалник Марјан Ристески, го излагале и му рекле дека не бил дојден.
„Гледам во моментот по скалите слегуваат татко му на Марјан и еден друг. Таман тие заминаа, еве ги 5-6 жени и еден маж влегоа и ги праша една од вработените каде ќе одат, рекоа ќе оделе да се видат со градоначалникот. Се качија горе кај него, никој не ги запре. Тогаш се налутив, крвта во мене зовре“, раскажува Настески.
„Кога излегов надвор, калдисав. Се собраа многу луѓе, ми нудеа пари да му однесам на децата. Три внуки имам, двете учат, гревовите не му се гледаат. Син ми е некоја операција направен, јас неспособен, две операции од карцином, жена ми од задув страда, немам пари за лекови. Дојде полиција, ме прашаа кај ќе одам, му реков ќе легнам онде на џаде, нека ме исцапаат поарно, да не ги гледам дома гревовите на децата“, вели Настески.
Седмочленото семејство Настески од прилепското село Галичани живее од пензијата на Јордан. Во неговите 70 години, Јордан никогаш немал проблеми ниту со полиција, ниту со суд. Заради неплатен данок од 5.000 денари, УЈП му ја блокирала сметката, па сега не можи да ја земи пензијата, по што семејството останало, како што вели, без скршен денар.
Соочен со сиромаштијата, Јордан бил принуден семејството да го преранува така што цел месец земал леб на вересија од соседното Кадино Село. Вели дека од срам, никогаш не побарал помош ниту од роднини или пријатели, ниту пак од државата.
Сега, за прв пат, помошта за Јован и неговото семејство стигна од Организацијата за демократска реакција и асоцијација на здруженија ОДРАЗ, која на Јордан ќе му ја плати казната и ќе му помогне со финансиски средства во висина на неговата пензија.