Министерството за правда подготвува измени на Законот за референдум и други облици на непосредно изјаснување на граѓаните. Се предвидува законските измени да бидат донесени по скратена постапка, објкавува Академик.
Според Министерството за правда, постојниот текст на Законот е неусогласен со текстот на Изборниот законик и со текстот на Законот за судовите.
Јавна расправа не е предвидена, а временската рамка за предлог-законот треба да се донесе најдоцна до 31 јануари.
Со Законот за референдум и други облици на непосредно изјаснување на граѓаните се уредуваат начинот и постапката за решавање и спроведување на референдум, покренување на граѓанска иницијатива, свикување и одржување на собир на граѓани, како и други прашања од значење за непосредно изјаснување на граѓаните.
Досега во историјата на Република Македонија се одржани два референдума на државно ниво, тој за независноста во 1991 и за територијалната организација во 2004 година.