Во наредниов период Комисијата за заразни болести ќе направи симулација за можна појава на петти бран на ковид-19, најави денеска министерот за здравство, Беким Сали.
Комисијата ќе планира како да се справиме со лекување пациенти со постковид компликации.
– Со попуштањето на мерките најавив дека постковид периодот е значаен за сите граѓани и, воопшто, за здравствениот систем. Комисијата ќе продолжи со работа, не со истото темпо, но со планирање како да се справиме со постковид. Дали во еден објект ќе се третираат сите постковид компликации или повеќе клиники за пациентите. Секако една од целите ни е симулација на можна појава на петти бран од ковид-инфекцијата, рече министерот Сали.
Иако деведесет и девет отсто од мерките за заштита од ковид-19 се укинати, министерот повика на внимателно однесување.
– Засега е мирно, а нема аларм ни за во иднина. Како одговорни граѓани, мора да внимаваме на местата каде се движиме, навреме да се јавиме ако имаме симптоми, ако сме позитивни да се изолираме, предупреди министерот Сали.
Здравствените власти наредниот период ќе го искористат за лекување на пациентите со постковид симптоми, но сè уште решаваат дали тоа ќе биде на едно место кадешто ќе има специјалисти од сите области или во делови од неколку клиники.