На Скопскиот маратон 2013 денеска на сите четири трки учествуваа рекордни 4.900 натпреварувачи од 36 земји од сите континенти.
Кенијците Вајклиф Кипкори Бивот во машка и Каролин Кипруто во женска конкуренција се победници на Маратон што се одржа по деветти пат во македонската метропола.
Патеката од 42 километри и 195 метри Бивот ја истрча за време од 2 часа 21 минута и 56 секунди што претставува нов рекорд на патеката и за две минути подобар од досегашниот. Кај дамите Кипруто трчаше со време од 2 часа 48 минути и 49 секунди и таа со нов рекорд.
Македонското државно првенство го освои Ристе Лазаров додека пак од жените Весна Кираџиева.
Во трката на најдолгата маратонска патека од 42 км се натпреваруваа околу 200 натпреварувачи, а за полумаратонот стартуваа 600. Најмногу тркачи по скопските улици имаше за трката на 5.000 метри, хуманитарната трка каде што стартуваа околу 3.500 рекреативци. Детскиот Колгеит мини маратон го трчаа 600 деца.