Бројот загинати во терористичкиот напад од саботата во луксузниот трговски центар во кениската престолнина Најроби, се зголеми на 59 загинати и повеќе од 200 ранети, јавува ББЦ, повикувајќи се на изјава на министерот за внатрешни работи на Кенија.
Кениските безбедносни сили се обидуваат да ја завршат заложничката драма од нападот на сомалиските исламисти, при што се уште не е познато колку лица се земени во заложништво.
Проценките се движат од седум до 36 заложници. Очевидци соопштија дека напаѓачите им дозволиле да го напуштат трговскиот центар Вестгејт само на муслиманите.
Според неименуван висок кениски функционер во нападот за кој одговорноста ја презема сомалиската исламистичка група Ал Шабаб, ранети се повеќе од 300 луѓе.
Меѓу убиените има и странци- Франција потврди дека две нејзини државјанки се убиени, додека американскиот Стејт департмент осудувајќи го нападот како „безумен акт на насилство”, објави дека се ранети тројца американски државјани. Меѓу убиените има и двајца Канаѓани, од кои еден е дипломат. Кинеската новинска агенција Синхуа, јави дека меѓу убиените е и една кинеска државјанка.
Терористичката група од десетина луѓе коишто зборувале на арапски и сомалиски јазик со употреба на автоматски пушки и гранати во саботата го нападна луксузниот трговски центар кој е особено посетен во текот на викендите.
Овој трговски центар претходно честопати беше посочуван како можна цел на терористички групи поврзани со глобалната терористичка мрежа Ал Каеда. Напаѓачите во неделата повеќе од 20 часа од нападот, се уште се забарикадирани во трговскиот центар кој е опкружен од силни армиски и полициски сили.
Објавувајќи ги податоците за жртвите на државната телевизија, кениските претседател Ухуру Кенијата соопшти дека меѓу загинатите има и членови на неговото пошироко семејство.
Преку социјалните мрежи сомалиската исламистичка група Ал Шабаба соопшти дека нападот е одмазда поради учеството на кениските сили во рамките на операцијата на соседните земји на Сомалија од 2011 година кога исламистите беа протерани од главниот град Могаишу и потиснати кон далечните провинции. Најавија, исто така, и нови напади во Кенија.
Високата претставничка за заедничка надворешна и безбедносна политика на Европската унија, Кетрин Ештон, изјави во неделата дека е ужасната од овој напад. „Ужасната сум од бруталниот напад врз невини граѓани во трговскиот центар Вестгејт во Најроби”, рече Ештон во соопштението изразувајќи сочувство до семејствата на жртвите