Државниот секретар на САД, Џон Кери тврди дека имаат докази дека во случајот со нападот со хемиско оружје кај Дамаск е употребен отровниот гас сарин.
Тестовите на коса и на крв се позитивни „на траги од сарин“, изјави американскиот Џон Кери за телевизиите Ен-Би-Си и Си-Ен-Ен, зборувајќи за нападот со хемиско оружје на 21 август, во близина на Дамаск во кој, според американски наводи, загинаа 1.429 лица.
Тој нагласи дека се работи за резултати од независна истрага на примероци на крв и коса, кои што ги добиле од спасители кои се нашле на местото на настанот, а не од инспекторите на ОН.
Според Кери станува збор за „многу важен развој“, за кој американската влада дознала „во изминатите 24 часа“. Шефот на американската дипломатија од Конгресот побара да и‘ даде зелено светло на Владата за воен напад врз раководството во Дамаск и изрази убеденост дека пратениците ќе гласаат „ЗА“. Во случај Конгресот да гласа со НЕ, според Кери „Претседателот има авторитет да дејствува, но Конгресот ќе го направи тоа што мора“.
Сојузниците на САД реагираат воздржано на ваквиот потег на Обама.
Во Сирија пак, државните медиуми јавуваат дека одлуката на Обама да побара мислење од Конгресот е „историско повлекување“. Сириската опозиција изрази скепса и од американскиот парламент побара да му даде зелено светло на Обама за воен напад.
Сирискиот претседател Башар ал-Асад денеска повтори дека неговата земја е подготвена за воениот напад од странство.