Сочувствувајќи со семејството на трагично загинатиот сопственик на „Фокус“, Никола Млaденов, Срѓан Керим ја повлекува во целост тужбата поднесена пред Основниот суд Скопје 2, се вели во денешното соопштение до јавноста испратено од адвокатската канцеларија Софрониевски.
На 25 минатиот месец НОВА објави дека Срѓан Керим го тужи дневниот весник “Фокус” поради текст во кој се пренесуваат извадоци од српскиот портал е – новине, а кој се однесува на продажбата на МПМ.
На првото подготовително рочиште, кое го следеа претставници на новинарскиот синдикат, како и претставници на американската амбасада, Керим не се појави.
Случајот “Керим против Фокус” беше мониториран од Здружението на новинари, Синдикатот на новинар и медиумски работници, како и Американската амбасада. Истиот ден кога загина Младенов, Јадранка Костова и Владо Апостолов до судот го испратија одговорот на друга тужба во која како тужител се јавува Сашо Мијалков, директорот на бирото за контрарузнавање. Двете тужби од Керим и Мијалков против Фокус се помеѓу првите поднесени по стапувањето на новиот закон за граѓанска одговорност.
Највисоката сума за нематеријална штета што може да биде досудена е 27.000 евра. Од нив 10.000 евра се за уредникот, 15.000 евра за сопственикот на медиумот и 2.000 евра за новинарот кој го напишал текстот.