Кетрин Ештон, шефицата на европската дипломатија побара итно да се прекине со насилствата во Киев и ги повика Владата и опозицијата да изнајдат начин за разговори за решавање на кризата.
Реакцијата на Ештон доаѓа откако денеска украинската полиција почна да ги отстранува барикадите од антивладните протести во Киев.
Утрово, еден демонстрант е убиен во Киев, медицинската служба на украинското протестно движење изјави за Си-Ен-Ен.
Министерството за внатрешни работи на Украина соопшти дека е известено за една жртва.
Премиерот Микола Азаров пак, демантира дека одговорни за убиството биле полициските сили, бидејќи според него во текот на акцијата, тие не носеле огнено оружје.
Демонстрантите се собираат од изминатиот викенд во пркос на нови закони со кои се ограничува правото на протест.
Во вторникот, Министерството за внатрешни работи изјави дека повеќе од 30 демонстранти биле уапсени и 119 полицајци повредени од неделата попладне, кога судирите започнаа.