Сопругата на притворениот новинар Кежаровски, Марина која заедно со него од вчера започна штрајк со глад, во разговор за НОВА вели дека не се чувствува добро, но главната грижа и е како се чувствува нејзиниот сопруг Томислав и она што ја погодува е фактот што нема кој да и каже за неговата психо-физична состојба.
Во меѓувреме била информирана дека директорката на затворот најавила дека Кежаровски може да биде префрлен во арестанското одделение, поради што Кежаровска вели:
„Секаде ќе го однесат само не дома. Зошто?“
Сопругата на Кежаровски вели дека до петок ќе чека заради тоа што некаде слушнала дека Обвинителството повторно ќе го разгледува случајот.
>> Новинарот Кежаровски штрајкува со глад во затворот
Самостојниот синдикат на новинари и медиумски работници, Здружението на новинари и Македонскиот институт за медиуми вчера со загриженост ја примија за веста дека новинарот Кежаровски ќе штрајкува со глад, и побараат итно да биде пуштен на слобода.
„Длабоко сме загрижени од веста за штрајкот со глад на новинарот Кежаровски и бараме итно да биде пуштен да се брани од слобода. Потсетуваме дека условите за тоа се исполнети: заврши распитот на сведоците во случајот за кој е притворен нашиот колега, а дадена е и имотна гаранција“, соопштуваат здруженијата.