Томислав Кежаровски, новинар на весникот „Нова Македонија“, е уапсен поради текст што го објавил во ноември 2008-ма година во тогашниот двонеделен магазин „Репортер 92“.
Според информациите на Нетпрес, магазинот во кој што во тоа време пишувал и Кежаровски, на 20-ти ноември објавил текст и факсимил од записникот од судењето за нарачаното убиството во велешко Ореше во кој што било наведено и вистинското име на заштитениот сведок „Бреза“ – Златко Арсовски.
„Репортер 92“ објавиле дека во предметот против браќата Ордан и Љупчо Ѓоргиевски, недостигале повеќе докази, поточно резултатите од вештачења на оружје, облека, догорче од цигара, траги од стапала и за присуство на барут, како и записот од детекторот за лаги.
Како нарачетел на убиството се обвинуваше Ѓоре Петровски кој долги години живеел во САД. Петровски поради обвинението за нарачано убиство беше екстрадиран во земјава.
Поради објавата на факсимилот од записникот и наводна кражба на предметот од велешкиот суд неколку месеци подоцна беше разрешен и судијата Валентин Зафиров што го водеше судењето за убиството на Лазар Милошевски.
Инаку, Кежаровски е уапсен утрово заедно со еден поранешен и еден актуелн судија, јавен обвинител и уште неколку лица. Според првичните информации од Министерството за внатрешни работи, во големата полициска акција вкупно се уапсени деветмина и направени се претреси на повеќе локации.
Уапсените веќе се однесени пред истражен судија во Основниот суд 1 во Скопје.