Властите во Украина и Русија се обвинуваат меѓусебно за организирање на смртоносните бомбашки напади во текот на изминатата недела.
На 14. декември, регионалната полиција на Днепро уапси осомничен во врска со експлозијата што се случи во центарот на градот претходно истиот ден.
Во експлозијата загина еден маж, а четворица се повредени, меѓу кои и двајца полицајци, кои се уште се во критична состојба во болница.
Според властите, осомничениот, 37-годишен локален жител, наводно дејствувал по наредба на руските разузнавачи. Осомничениот беше уапсен за неколку часа по заедничката операција на полицијата и Украинската служба за безбедност – СБУ.
СБУ го окарактеризира инцидентот како терористички напад.
Во меѓувреме, на 15. декември, Руската Федерална служба за безбедност – ФСБ објави дека е уапсен осомничениот за нападот со автомобил-бомба во Доњецк, во кој наводно загинал поранешен затворски управник, а неговата сопруга е ранета на 9 декември. Руските државни медиуми наведуваат дека осомничениот е локален жител.
ФСБ тврди дека осомничениот подметнал експлозивна направа од домашно производство под возилото и го активирал од далечина, постапувајќи по наредба на Управата за одбранбено разузнавање на Украина.
Руските власти не го објавија идентитетот на загинатиот во експлозијата, опишувајќи го само како офицер. Сепак, извештаите на социјалните мрежи го идентификуваа како Сергеј Евсјуков, поранешен шеф на затворот во кој беа убиени десетици украински војници заробени од руските сили во 2022 година.
Никој не презеде одговорност за ниедна од експлозиите.