Поради информациите дека е вршен огромен притисок врз јавниот сектор од страна на градоначалници и директори за присуство на контра-протест пред Уставниот суд, дополнителниот заменик-министер Александар Кирацвоски, рече дека ќе испрати управна и трудова инспекција во неколку градови.
Тој потенцираше дека институциите на системот мора да ја почитуваат волјата на граѓаните, а тоа подразбира и Уставниот суд, и кадрите кои раководат со партизираните институции од страна на власта на Никола Груевски.
– Според информациите со кои што располагам, вчера и денеска вршени се огромни притисоци врз вработени во јавниот сектор особено во општините, училиштата и јавните претпријатија, како и вработените во државните претпријатија. Притисоците се вршени лично од страна на директорите и градоначалниците од ВМРО-ДПМНЕ. На вработените им е наложено со директиви од нивните партиски шефови и со закани дека ќе останат без работа, да отидат на контра протестот пред Уставниот суд. Тоа се случува во Битола, Прилеп, Штип, Крушево, Кочани, Крива Паланка, Охрид и други општини, од каде од утрото се тргнати автобуси организирани од власта на ВМРО-ДПМНЕ, изјави Кирацовски.
Тој посочува дека е очигледно дека вработените се вадат од нивните работни места во работно време и спротивно на нивна волја.
– Казните за директорите, раководителите, градоначалниците, за сите оние кои го правеле тоа се мошне сериозни и им порачувам да не ги занемаруваат! Масовниот протест синоќа на кој што слободно, по сопствена волја, присуствуваа над 12.000 граѓани, е гласна и силна порака и до власта на Никола Груевски и до партиските инсталации во Уставниот суд. Се враќа демократска Македонија! Промените почнаа и назад нема! Сите кои соработувале или соработуваат со режимот и противзаконски, противуставно нанеле и нанесуваат штета на правата и интересите на граѓаните, ќе одговараат, порача заменик-министерот Кирацовски.