Ќе се интензивираат преговорите за името
Во наредниот период ќе се интензивира процесот на преговори за изнаоѓање на решение за проблемот со името. Ова во интервју за Радио Слободна Европа го најави вицепремиерот за европски интеграции Фатмир Бесими.
Во однос на прашањето за името очекуваме да има интензивирање на дијалогот во тој дел, со цел да може до јуни да се заокружи и да се покаже конкретен напредок во тој дел, затоа што тие се работи кои се ставени како заклучоци на декемврискиот извештај. Сметаме дека во овој дел Македонија треба да покаже напредок и очекуваме и тоа да биде евалуирано или оценето од страна на земјите членки на ЕУ. Македонија во овој период треба да се фокусира и на тој дел затоа што тоа е една од главните теми, покрај овие политички внатрешни теми и реформските што беа споменати, добрососедските односи и прашањето за името остануваат клучни фактори во дефинирањето или во оценката за напредокот на Република Македонија за започнување на преговорите за членство во ЕУ, изјави Фатмир Бесими.
Во врска со исходот од новите рунди разговори за името, Бесими се воздржува од кометра дали тие ќе донесат резултат.
Не би било соодветно да прогнозирам, затоа што е процес кој не зависи само од една страна, но тоа што можам со сигурност да го кажам е дека е исклучително важно процесот да се динамизира, исклучително е важно да сме активни и исклучително е важно не само за Македонија, туку и за ЕУ и за Грција и за регионот да има напредок за Македонија и за останатите земји во регионот за започнување на преговорите со ЕУ да станеме членка на Унијата, изјави Бесими во интервју за Слободна Европа.