Министерството за култура има објавено два нови тендера за објектот „Македонска Филхармонија“, потврди за НОВА, министерката Елизабета Канческа-Милевска.
Едниот од тендерите е распишан за доработување на кровот и фасадата на „Македонска Филхармонија“, додека другиот за ентериерот. И двата тендера се во тек и сеуште нема одбрано фирма која ќе ги врши градежните активности.
„Поради незавршената работа на фирмата „Алпине“ која замина под стечај, распишавме нов тендер за довршување на кровот и фасадата на објектот“, изјави Канческа-Милевска.
Таа вели од двата договора со „Алпине“, завршени е околу 70 проценти од работата, и причината за распишувањето на новиот тендер е токму пресекот на досега извршеното.
Досега за овој објект се потрошени околу 7,4 милиони евра.
Воедно, за новиот тендер во вредност од 1,4 милиони евра, за Музејот на македонската борба, веќе е избрана фирмата. Активностите ќе ги извршува градежната компанија „Бетон“ Скопје.
– Се работи за поставување на сосема нова музејска поставка на вториот балкон од кружното ниво за прикажување на други процеси од историјата, потврди министерката.
Во новата поставка вклучени се и нови восочни фигури, предмети, и аудио-визуелни обработки.
Предвидениот рок за изведба на работите изнесува шест месеци.