Поетите Ефтим Клетников од Македонија и Анте Стамаќ од Хрватска се годинешните добитници на наградата „Книжевен жезол”.
На свечено отворање на „Празник на липите”, Христо Петрески, претседател на Организациониот одбор на манифестацијата, со нескриено задовоство ги поздрави присутните и истакна дека за него липите се едни од најубавите и најблаготворните растенија, и вистинска привилегија е да си скопјанец затоа што можеш да ги отвориш прозорците и да уживаш во нивната убавина и опоен мирис.
„Пишаниот збор предаден преку творбите на поетите, без разлика дали е лирична, елегична, надреалистична или современа поезија, останува како дел од севкупното уметничко, културно и цивилизациско наследство на градот Скопје и Република Македонија. Секоја година традиционално Скопје ја слави поезијата и убавата реч, во периодот кога цветаат липите, чиј опоен мирис го најавува доаѓањето на летото, но и ја одбележува оваа значајна поетска манифестација. Липите се препознатлив дел на скопските пејзажи и се интегрален дел од старите скопски улици и маала. Затоа манифестацијата ”Празник на липите” претставува еден вид симбиоза меѓу две различни естетски компоненти на градот – истакна претседателот на Советот на Град Скопје, Ирена Мишева.