„Здружението на судиите на Република Македонија смета дека судиите имаат капацитет и интегритет да ја вршат судиската функција согласно Уставот, законите и меѓународните договори ратификувани согласно Уставот на Република Македонија и со тоа обезбедуваат непристрасно судење, заштита и унапредување на слободите”.
Ова соопштение, со цела сериозност и претпоставувам со нападно климање на глава додека е пишувано, за да се додаде дополнителна тежина, е потпишано од претседателот на тоа здружение Николчо Николов, кој има манир на овој начин да протестира секогаш, кога судиите се предмет на критика, особено од новинарите.
Овој пат, ова негодување, иако на прв поглед изгледа само како рецитација за крајната чесност и совршеноство на судиите, значи овој пат, најверојатно, судејќи според тајмингот е резултат на најавата на ЕУ за испраќање на експерти, кои ги побара Јавното обвинителство.
Судијата Николчо Николов, никој не се сомнева, стои зад се што е потпишано и после последната бомба, која се однесува токму на светото судство, она истото за кое говори и самиот Груевски, кога гарантира независно и фер судење на Заев.
Што би рекол светецот Николов, судиите имаат интегритет и капацитет, а ако се уште не ви е јасно до крај за што овој човек воопшто зборува при здрав разум, пуштете ги лентите на кои ќе ги слушнете цвркотењата на Јанкуловска, Ставревски, браќата Мијалкови, Муса Џафери итн, итн. Ако навистина ви се неопходни потпис и печат за величината на боговите-судии, за чија пресветлост Николов се колне и на сопствената, смртна постела. Судска, се разбира.
Знам, ВМРО и Груевски не се откажуваат до последен здив од тезата дека се лепени, прелепувани, сечени и монтирани овие разговори добиени од странски служби, но повикајте еден просечен ум од телевизиски или радиски тонец да ви направи проценка за квалитетот на овие течни и полни со веселба разговори и процентот на веројатност до совршенство да се фингираат.
Ќе го добиете одговорот дека е еднакво на нула, една голема нула, истата таа нула која ја добива и Груевски од меѓународниот фактор (последни беа ОН), кога со студен тон му се соопштува загриженост и порака дека не е важно од каде се добиени лентите, туку што содржат. Лепењето и монтирањето никој не ги споменува. Таа фарса му ја оставаат на Груевски, затоа што знаат дека е се што може да понуди во моментов.
Но, оној ден кога ќе седне на масата со нив, нема да ги спомене ниту сечењата и монтирањата, ниту пак странските служби и комбињата кои ги сервисирале. Тогаш ќе се соочи дека ќе дојде ден кога некое друго комбе ќе чека пред неговата резиденција. Без грижа, во него ќе биде и Миле Јанакиески.