Што содржат предлозите на професорката Гордана Силјановска – Давкова, член на Комисијата за изборно законодавство како претставник на ОБСЕ/ОДИХР, кои предвидуваат фер изборно рекламирање и зошто тие решенија не можат да влезат во изборното законодавство?
Повикувајќи се на праксата на некои од европските демократии, Силјановска за НОВА ги претставува предлозите кои би спречиле злоупотреби од моќните партии и би помогнале во организирањето на фер избори и фер претставување на кандидатите. Прочитајте го разговорот со професорката Силјановска – Давкова.
Каква е праксата на дел од европските земји во делот на она што значи фер изборно претставување во кампања? Го споменавте примерот со Британците и начинот на кој таму се одвива политичкото рекламирање за чие решение сметате дека би било идеално во Македонија. Што предвидуваат тие решенија?
-Британците се одлучиле за едно решение во кое нема платено политичко време. Заради еднаквоста на сите натпреварувачи во изборниот натпревар, однапред се определува време кое е доволно, неплатено, за секоја од партиите да го изложи она што смета дека е најважно, без оглед дали е во перцепциите мала или голема по бројот на членовите.
Слична пракса постои и во однос на рекламирањето на партиите на билборди. Како изгледаат тие решенија?
-Деновиве сме изложени на некои слики мамутски низ градот кои мене ме асоцираат на Северна Кореја и тоа дури и во рекламократијата се нарекува ефект или синдром на Ким Ил Сунг. Мислам дека е крајно време во изборниот законик да се одредат димензиите на изборниот материјал, па ние граѓаните да си отидеме пристојно на една уличка на која во исти димензии ќе бидат сите кандидати за изборите, да си продискутираме, да си донесеме заклучок. Мислам дека е непристојно во една од најсиромашните земји толку пари да се фрлаат на рекламен материјал, кој потоа останува до следните избори.
Како претставник наОБСЕ/ОДИХР во комисијата за изборно законодавство овие решенија сте ги предложиле во рамки на комисијата? Колку пати е дискутирано на оваа тема и постоеле ли било какви можности вашите предлози да поминат?
-Многупати сум го предложила ова, еве и годинава го предложив како член на Комисијата за изборното законодавство како претставник на ОБСЕ/ОДИХР. И во претходните комисии и сега сум велела зошто да не бидеме како Германија, Чешка и други. И ова влегувало дури и во предлозите, но потоа во решенија не влегувало , некаде на патот до владиниот форум исчезнувало.